Það kom sko engin önnur kaka til greina til að loka þessum lakkrísmánuði en þessi. Ég á ekki til orð til að lýsa því hve sjúkleg hún er.
Í uppskriftinni, sem er ofureinföld svo því sé haldið til haga, er karamellusósa en ég bý alltaf til sömu heimagerðu karamellusósuna og uppskrift að henni má finna hér. Mér finnst hún einfaldlega bara miklu betri en þær tilbúnu sósur sem ég hef prófað en auðvitað er ekkert mál að stytta sér leið og kaupa tilbúna.
Svo saxaði ég lakkrískúlur frá Johan Bülow til að hafa ofan á þessari dásemd en kúlurnar eru sko ekki bara til skrauts. Þær undirstrika allt sem er í gangi í kökunni og lyfta henni upp á hærra plan. Þannig að ekki sleppa kúlunum – þær eru trylltar!
Sjáið hvernig lakkrísglassúrinn lekur niður hliðarnar.
Kúlurnar ofan á eru stórkostlegar.
Þessi kláraðist einn, tveir og þrír.
Þessi kaka er ekki að grínast með hvað hún er góð.
Karamellukaka með lakkrísglassúr
|
|
|
Hráefni
Kaka
- 115g mjúkt smjör
- 1bolli sykur
- 2 Nesbú-egg
- 1tsk vanilludropar
- 1 1/2bolli Kornax-hveiti
- 1/4tsk lyftiduft
- 1/4tsk matarsódi
- 1/2tsk sjávarsalt
- 1msk karamellusósa
- 1/2bolli rjómi
Glassúr
- 1/4bolli lakkríssíróp frá Johan Bülow
- 2msk flórsykur
- 10 lakkrískúlur frá Johan Bülow(til að skreyta)
Leiðbeiningar
Kaka
- Hitið ofninn í 180°C og smyrjið formkökuform.
- Blandið smjöri og sykri vel saman. Bætið eggjunum og vanilludropum saman við og hrærið vel.
- Blandið hveiti, lyftidufti, matarsóda og salti saman við og hrærið.
- Að lokum er karamellusósunni og rjómanum blandað vel saman við.
- Hellið deiginu í formið og bakið í 45 mínútur.
Glassúr
- Blandið sírópi og flórsykri saman og hellið yfir volga kökuna.
- Saxið lakkrískúlurnar og drissið þeim yfir glassúrinn.
