Ég kynntist nýju lostæti á dögunum sem heitir Súkkulaðibögglar frá Freyju. Við erum að tala um gamla góða Bugles-snakkið, húðað með súkkulaði. Hljómar skringilega, ég veit, en þetta er eitt allra besta nammi sem ég hef smakkað! Heilu pokarnir bara renna ofan í mig og ég fæ ekki nóg af þessu!
Þegar ég var á sirka poka 10 og orðin illa haldin af magaverk datt mér í hug að það væri geðveikt að búa til marens úr þessum unaðsbitum. Þannig að ég staulaðist inn í eldhús, því maður er auðvitað aldrei það slappur að maður geti ekki bakað, og skellti í Súkkulaðibögglamarens.
Hugboðið mitt var rétt. Þessi blanda af Súkkulaðibögglum og marens er ómótstæðileg! Þetta er nýi uppáhaldsmarensinn minn.
Hættu nú alveg!
Þrjár hæðir af unaði.
Gerviblóm og marens. Yndislegt.
Súkkulaðimarens með Freyju-karamellusósu
|
|
|
Hráefni
Marens
- 200g Nesbú-eggjahvítur(ca 5 stykki)
- 1 1/4bolli sykur
- 3tsk lyftiduft
- 150g Súkkulaðibögglar(saxaðir)
- 1/2l rjómi(þeyttur)
- 1/4bolli flórsykur
Skreyting
- 10 Freyju karamellur
- 6-8msk rjómi
- 50g Súkkulaðibögglar(saxaðir)
Leiðbeiningar
Marens
- Byrjum á marensinum. Hitið ofninn í 150°C. Takið til 2 smjörpappírsarkir og teiknið 3 jafnstóra hringi (ca 18-19 sentímetra) á pappírinn.
- Þeytið eggjahvíturnar í tandurhreinni skál þar til þær byrja að freyða.
- Bætið sykrinum við í einni bunu á meðan þið þeytið hvíturnar. Þeytið blönduna í 15-20 mínútur eða þangað til þið getið haldið skálinni á hvolfi og ekkert lekur niður.
- Blandið Súkkulaðibögglum og lyftidufti saman og blandið því saman við marensinn með sleif eða sleikju.
- Deilið blöndunni á milli hringjanna þriggja. Bakið í 40 mínútur og leyfið kökunum að kólna í ofninum. Hafið samt smá rifu á honum.
- Þeytið svo hálfan líter af rjóma saman við flórsykurinn.
Skreyting
- Setjið rjóma og karamellur í skál og bræðið saman í örbylgjuofni. Hrærið í blöndunni á 30 sekúndna fresti.
- Smyrjið 1/2 af rjómanum á neðsta botninn og setjið annan botn ofan á. Smyrjið restinni af rjómanum ofan á miðjubotninn og setjið síðasta botninn ofan á.
- Hellið karamellusósuna yfir toppinn og skreytið með Súkkulaðibögglum.
