Jæja, þá er komið að því – minn fyrsti drykkur hér á Blaka. Þvílík tímamót! Mér finnst að ég ætti að fagna þessu alveg sérstaklega. Ætti ég að baka köku í tilefni dagsins?!
En að öllu gríni slepptu þá bara varð ég að prófa hvernig útkoman væri ef ég myndi blanda tveimur elskhugum í lífi mínum saman – ís (ó, hve mikið ég elska ís!) og sykurpúðum. Ég er svo ánægð með útkomuna og mér finnst hún líka svo falleg!
Þannig að ef ykkur vantar skemmtilegan og öðruvísi eftirrétt þá mæli ég með þessum sjeik. Algjör unaður og eina vandamálið er hvað hann er fljótur að hverfa ofan í mann. Þessi rör sko, það er ekki hægt að treysta þeim!
Sykurpúðar og kaffi klikkar ekki saman.
Smá „diner“ fílíngur.
Það er fátt betra en góður sjeik.
Fallegur hringur.
Stórkostlegur sykurpúða- og kaffisjeik
|
|
|
Hráefni
- 3bollar súkkulaðiís
- 1 1/2bolli kaffi
- 1/4bolli súkkulaðisósa
- 1/4bolli Marshmallow Fluff(ég fæ mitt alltaf í Hagkaupum)
- 2 hafrakex, mulin
- nokkrir litlir sykurpúðar
Leiðbeiningar
- Þessi uppskrift dugir í tvö frekar stór glös og fjögur lítil.
- Hellið súkkulaðisósunni í skál og dýfið glösunum ofan í á hvolfi þannig að sósan hylji efsta part glasanna.
- Rúllið glasabrúnunum upp úr hafrakexmulningnum og hjálpið honum aðeins að festast við súkkulaðisósuna. Setjið glösin til hliðar.
- Blandið ís, kaffi og Marshmallow Fluff saman í blandara í nokkrar mínútur.
- Hellið blöndunni varlega í glösin og skreytið með nokkrum, litlum sykurpúðum.
