Þessir klattar eru sko ekkert aprílgabb. Þetta er algjörlega skotheld uppskrift og ofureinföld þannig að hún getur alls ekki klikkað! Þvílík byrjun á poppmánuðinum mikla!
Ég notaði smá af Butterscotch-bitum í þennan unað en ef þið finnið þá ekki getið þið notað hvaða súkkulaði sem ykkur finnst gott. Reynið samt að finna Butterscotch-bita því þeir lyfta þessum klöttum upp í nýjar hæðir. Algjört lostæti sem maður getur hreinlega ekki hætt að borða! Nammið gerist ekki mikið betra en þetta.
Þessir kláruðust alltof fljótt!
Nammi namm!
Dúllur!
Algjör nauðsyn að hafa súkkulaði ofan á.
Poppklattar sem þarf ekki að baka
|
|
|
Hráefni
- 2msk smjör
- 1/2bolli hnetusmjör
- 280g Sykurpúðar(mér finnst gott að nota þessa litlu)
- 1poki Orville Redenbacher's Naturals-örbylgjupopp(um það bil 10 bollar)
- 1/3bolli butterscotch-bitar
- 1/3bolli súkkulaðibitar
- 1/2tsk sjávarsalt
- 70g rjómasúkkulaði
Leiðbeiningar
- Byrjið á því að bræða smjör og hnetusmjör saman í stórum potti yfir lágum hita. Passið að hræra stanslaust í blöndunni svo hún brenni ekki við.
- Bætið sykurpúðunum út í og hrærið stanslaust þar til allt er vel blandað saman.
- Takið pottinn af hellunni og bætið poppi (passið að engar baunir fylgi með), Butterscotch-bitum, súkkulaðibitum og sjávarsalti saman við og hrærið vel. Hér eru hröð handtök nauðsynleg því blandan stífnar fljótt upp.
- Þrýstið blöndunni í ílangt form (ca 33 cm langt) sem þið eruð búin að klæða með bökunarpappír þannig að hann komi upp á hliðunum.
- Bræðið rjómasúkkulaðið og drissið ofan á blönduna. Leyfið þessu að jafna sig í um það bil klukkustund í ísskáp áður en þið hámið þetta í ykkur.
