Ég er ein af þeim sem trúir því að múffa verði að vera svo góð að hún nánast bráðni uppí þér til að réttlæta það að það sé ekkert krem á henni. Því krem er náttúrulega guðs gjöf – það vita allir. Flestar kökur eru bara ekki fullkomnar nema með kremi.
Þess vegna getið þið trúað mér kæru lesendur að þessar múffur eru góðar. Mjög góðar. Eiginlega algjört rugl. Þær þurfa ekki krem. Þær eru fyrir ofan krem hafnar.
Öss, sjáiði hneturnar!
Þessi möffinsform eru falleg #mínskoðun.
Ljúffengar og laglegar.
Þvílík fegurð.
Viltu borða mig?
Kaffi- og pekanhnetumúffur
|
|
|
Hráefni
- 1 1/2 bolli hveiti
- 1/2bolli kakó
- 1/2tsk lyftiduft
- 1tsk matarsódi
- 1/2tsk kanill(má sleppa)
- 1/4tsk salt
- 1/2bolli sykur
- 1/2bolli ljós púðursykur
- 1 stórt egg
- 3/4bolli mjólk
- 1/4bolli sterkt kaffi
- 1tsk vanilludropar
- 115g bráðið smjör
- 1/2bolli saxaðar pekanhnetur
- 1/2bolli súkkulaðibitar
Mulningur
- 2msk púðursykur
- 2msk saxaðar pekanhnetur
- 2msk súkkulaðibitar
Leiðbeiningar
- Hitið ofninn í 190°C. Blandið saman hveiti, kakó, lyftidufti, matarsóda, kanil, salti, sykri og ljósum púðursykri í skál og setjið til hliðar.
- Blandið saman eggi, mjólk, kaffi, vanilludropum og smjöri í annarri skál.
- Blandið þurrefnablöndunni varlega saman við og passið að blanda ekki of vel. Blandan á að vera þykk og kekkjótt.
- Hrærið því næst hnetum og súkkulaði við með sleif.
- Skiptið deiginu á milli möffinsforma. Búið svo til mulninginn.
- Blandið sykri, hnetum og súkkulaði saman og drissið yfir kökurnar. Bakið í 20 til 27 mínútur.
