Fastur liður í öllum barnaafmælum á þessu heimili eru einhvers konar Rice Krispies bitar. Krakkar elska Rice Krispies og þegar að tíu ára dóttir mín, hún Amelía Björt, ákvað að hafa Oreo-þema í afmælinu sínu í janúar síðastliðnum vorum við ekki í neinum vafa um að við myndum búa til eitthvað stórkostlega gómsætt þegar að Oreo-kexi og Rice Krispies yrði blandað saman.
Útkoman eru þessir æðislegu Oreo Rice Krispies-bitar sem voru étnir upp til agna í afmælinu. Sykursætir og yndislegir fyrir allan peninginn!
Það sem mestu máli skiptir er auðvitað að afmælisbarnið varð himinlifandi þegar hún smakkaði þennan bræðing og stalst í nokkur stykki áður en gestirnir mættu á svæðið – þá er tilganginum náð.
Því hvet ég ykkur til að búa til þessa Oreo Rice Krispies-bita, hvort sem það er fyrir stórviðburð eins og afmæli eða bara ósköp venjulegur dagur.
Þeir svo sannarlega bæta og kæta.
Oreo Rice Krispies fyrir lengra koma
|
|
|
Hráefni
- 115g smjör
- 560g Sykurpúðar
- 1tsk vanilludropar
- smá sjávarsalt
- 7bollar Rice Krispies
- 20-24 Oreo-kexkökur(grófsaxaðar)
Leiðbeiningar
- Smyrjið ílangt form, um 30 sentímetra að lengd.
- Bræðið smjörið í stórum potti yfir meðalhita. Þegar það er bráðið leyfið því að bubbla í nokkrar mínútur til viðbótar, þar til það verður ljósbrúnt og kominn er karamellukeimur af því.
- Bætið sykurpúðum saman við og lækkið hitann lítið eitt. Hrærið stanslaust þar til þeir eru nánast bráðnaðir. Bætið vanilludropum og salti saman við og hrærið.
- Takið pottinn af hellunni og bætið Rice Krispies og Oreo vel saman við. Setjið blönduna í formið. Varið ykkur á því að blandan er klístruð og því er um að gera að setja smá matarolíu á hendurnar til að geta betur unnið með hana.
- Kælið í um klukkutíma, skerið svo í bita og horfið á bitana hverfa ofan í munninn.
