Þetta er án efa ein einfaldasta uppskriftin í bókinni minni, Minn sykursæti lífsstíll, og fullkomin fyrir Bounty-elskendur.
Bara þrjú hráefni! Já, ég sagði ÞRJÚ HRÁEFNI.
Þetta er jú einu sinni uppskrift að Bounty sem þú getur barasta búið til heima! Hve fullkomið?
Í þessa uppskrift nota ég sæta dósamjólk, sweetened condensed milk, sem er í miklu uppáhaldi hjá mér eins og lesendur bloggsins hafa eflaust tekið eftir.
Það má að sjálfsögðu móta Bounty-ið að vild, til dæmis í litlar kúlur eða sæta kodda.
Útlitið skiptir ekki öllu – en bragðið gerir það!
Mynd: Sunna Gautadóttir
Heimagert Bounty
|
|
|
Hráefni
- 200g kókosmjöl
- 1dós sæt dósamjólk(sweetened condensed milk - 397 g)
- 200g dökkt súkkulaði
Leiðbeiningar
- Blandið kókosmjöli og mjólkinni vel saman. Mótið síðan litlar, nú eða stórar) lengjur úr blöndunni og raðið lengjunum á plötu eða disk sem búið er að klæða með smjörpappír.
- Setjið plötuna eða diskinn inn í ísskáp og kælið í um klukkustund.
- Bræðið súkkulaðið en þið getið auðvitað notað mjólkursúkkulaði ef þið viljið. Hér finnst mér best að dýfa toppinum á Bounty-inu í súkkulaðið, setja lengjuna aftur á smjörpappír og leyfa toppinum að storkna. Síðan að dýfa botninum í súkkulaði og leyfa súkkulaðinu aftur að storkna. Þið getið auðvitað súkkulaðihúðað Bounty-ið eins og þið viljið. Skiptir svo sem litlu máli hvernig þetta lítur út því bragðið er aðalmálið. Og bragðið er gott!
