Uppskriftinni minni að Snickers-eplaköku er búið að deila rúmlega 4000 sinnum og er ég ævinlega þakklát fyrir það. En út af því að hún er svo ofboðslega vinsæl ákvað ég að taka smá snúning á þeirri uppskrift, breyta henni aðeins og hlaða í kaffieplaköku.
Ég hafði mínar efasemdir um að þetta myndi virka en viti menn – þetta svínvirkar. Algjört lostæti sem er svo ofureinfalt að skella saman að það hálfa væri nóg.
Þið verðið að prófa þessa – þó að þið drekkið ekki kaffi. Hún er æði! En passið ykkur á henni líka. Ég hlóð í eina svona heila og kláraði hana næstum því alla ein! Ekki segja neinum!
Fáránlega einföld kaffieplakaka
|
|
Hráefni
Fylling
- 1kg epli(afhýðuð og skorin í litla teninga)
- 1msk Kornax-hveiti
- 1bolli sterkt kaffi
- 1/2bolli púðursykur
- 1/2tsk kanill
Mulningur
- 1bolli haframjöl
- 1bolli Kornax-hveiti
- 1bolli púðursykur
- 1/2tsk lyftiduft
- 1tsk kanill
- 125g brætt smjör
- 1/4tsk salt
- 10-12 Freyju karamellur
Leiðbeiningar
Fylling
- Hitið ofninn í 180°C og takið til meðalstórt eldfast mót.
- Blandið öllu í fyllinguna saman í skál og leyfið því að liggja í um hálftíma.
- Setjið fyllinguna í botninn á eldfasta mótinu en látið sem mestan safa leka af henni svo að kakan verði ekki of blaut.
Mulningur
- Blandið öllum hráefnum, nema karamellum, saman þar til blandan líkist blautum sandi.
- Raðið karamellunum ofan á eplin og dreifið síðan mulningnum ofan á.
- Bakið í 35-40 mínútur og leyfið kökunni að standa í 10-15 mínútur áður en þið dýfið ykkur í hana.