Ég er svolítið mikið að elska þetta eplaþema enda epli afar vinsæl á mínu heimili. Svo passa þau líka svo vel með karamellu – eitthvað sem ég dýrka og dái.
Hér erum við að tala um einstaklega auðvelda epla- og karamellubita sem má bera fram heita með ís eða rjóma en eru líka ofsalega gómsætir ískaldir og beint úr ofninum.
Þessi uppskrift öskrar á veturinn og fátt betra en að tylla sér niður með heitan drykk og þessa bita sér við hlið, umvafinn kertaljósi. Ég mæli með því!
Nóg af eplum í þessum bitum.
Ég elska epli!
Dísætt og dásamlegt!
Yndislegir epla- og karamellubitar
|
|
|
Hráefni
Botn og mulningur
- 1 1/2bolli Kornax-hveiti
- 1 1/2bolli haframjöl
- 1bolli ljós púðursykur
- 1tsk matarsódi
- 1/2tsk salt
- 10msk bráðið smjör
- 2tsk vanilludropar
Fylling
- 3bollar epli(afhýdd og skorin í litla bita)
- 1/2msk sítrónusafi
- 3/4tsk kanill
- 1 1/2msk maíssterkja
- 1/2 - 3/4bolli karamellusósa
Leiðbeiningar
Botn og mulningur
- Hitið ofninn í 180°C og takið til ílangt form, ca 33x18 sentímetra. Klæðið það með smjörpappír
- Blandið öllum þurrefnum vel saman í skál og bætið síðan smjöri og vanilludropum saman við.
- Takið 1 bolla af blöndunni frá og skellið restinni í formið og þrýstið í botninn.
- Bakið í 10 mínútur og kælið lítið eitt.
Fylling
- Blandið eplum, sítrónusafa, kanil og maíssterkju vel saman í skál og raðið yfir botninn.
- Dreifið karamellusósu yfir eplin.
- Dreifið 1 bolla af mulningi yfir karamellusóuna og bakið í 30-35 mínútur.
