Ég elska þegar uppskriftir og kruðerí koma mér á óvart. Eitthvað sem ég hélt að yrði afleitt verður bara algjör draumur.
Þessar smákökur eru gott dæmi um það og þess vegna kalla ég þær dúllur. Því þær eru svo sætar og góðar þrátt fyrir að ég hafi vanmetið þær í fyrstu og haldið þær ógeðslega vondar. Ég nefnilega gat ekki ímyndað mér að smákökur með ferskum berjum yrðu góðar. En stundum er bara svo gott að hafa rangt fyrir sér!
Ekkert að þessu!
Þessar verðið þið að smakka!
Þrusuþrenna – bláber, hvítt súkkulaði og haframjöl.
Bláberja- og súkkulaðidúllur
|
|
|
Hráefni
- 115g mjúkt smjör
- 1/2bolli sykur
- 1/2bolli ljós púðursykur
- 1 stórt Nesbú-egg
- 2tsk vanilludropar
- 1bolli Kornax-hveiti
- 2tsk maizena
- 1/2tsk salt
- 1/2tsk matarsódi
- 1/4tsk lyftiduft
- 1bolli haframjöl
- 2/3bolli grófsaxað hvítt súkkulaði
- 1bolli bláber(fersk eða frosin)
Leiðbeiningar
- Hitið ofninn í 170°C og setjið bökunarpappír á ofnskúffur.
- Blandið smjöri, sykri og púðursykri vel saman. Blandið egginu við og vanilludropunum og hrærið vel.
- Blandið saman hveiti, maizena, salti, matarsóda og lyftidufti í annarri skál.
- Hrærið smjörblöndunni saman við þurrefnin þar til allt er næstum því alveg blandað saman.
- Blandið haframjölinu saman við með sleif og því næst súkkulaðinu og bláberjunum.
- Búið til kúlur úr deiginu og raðið á ofnskúffurnar. Bakið í 16 til 19 mínútur eða þar til brúnirnar á kökunum eru farnar að brúnast.
