Ó, Maltesers. Við hittumst á ný!
Hér er enn á ný uppskrift úr bókinni minni, Minn sykursæti lífsstíll, en myndirnar tók Sunna Gautadóttir, ljósmyndari.
Ég veit ekki með ykkur en mér finnst Maltesers gjörsamlega ávanabindandi nammi. Ég á í ástar-haturssambandi við það. Ég elska hvað það er gott en hata að ég fæ mig ekki til að stoppa átið eftir að ég byrja. Nútímavandamál í hnotskurn.
Fyrir þá sem vilja ekki, þora ekki eða nenna ekki að baka er þetta kjörið kruðerí. Ofureinfalt, stökkt og brakandi.
Ómótstæðilegir Maltesers-bitar sem þarf ekki að baka
|
|
|
Hráefni
- 250g hafrakex
- 220g mjólkursúkkulaði
- 220 g hvítt súkkulaði
- 180g smjör
- 4tsk síróp
- 310 g Maltesers
Leiðbeiningar
- Takið til kassalaga form sem er 20x20 sentímetra stórt. Klæðið það með smjörpappír og leyfið honum að ná aðeins upp hliðarnar.
- Myljið kexið í spað. Setjið smjör, súkkulaðið og síróp í skál sem þolir örbylgjuofn og hitið í 30 sekúndur í senn þar til allt er bráðnað. Hrærið vel saman.
- Hrærið hafrakexinu saman við smjörblönduna með sleif eða sleikju. Takið um 20 Maltesers-kúlur frá og blandið restinni saman við smjörblönduna með sleif eða sleikju.
- Hellið blöndunni í formið og þrýstið niður með skeið. Þrýstið síðan Maltesers-kúlunum sem þið tókuð frá ofan í kökuna. Leyfið kökunni að jafna sig í ísskáp í um 4 klukkustundir. Þessi er svakaleg!
