Ég er í svo ógurlega miklu þjóðhátíðarstuði í dag að ég ákvað að hlaða í eina uppskrift sem er alls ekki neitt í anda þema mánaðarins. Þetta, dömur mínar og herrar, eru 17. júní-bollakökur. Uppskriftina fann ég fyrir mörgum árum í Gestgjafanum og er þetta ein af bollakökunum sem ég geri nánast fyrir hvert einasta mannamót sem ég ber ábyrgð á. Þær eru bara það góðar.
Ég lék mér með fánalitina í kreminu og notaði sömu aðferð og í sítrónubollakökunum – eina bláa rönd öðru megin í sprautunni og eina rauða rönd hinu megin. Gæti ekki verið einfaldara!
Það er kominn 17. júní!
Hæ hó og jibbý jey!
Hér eru bollakökurnar í góðum félagsskap.
Þjóðhátíðarbollakökur
|
|
|
Hráefni
Kökur
- 50g mjúkt smjör
- 90g sykur
- 1 egg
- 90g Kornax-hveiti
- 1/2tsk matarsódi
- 1tsk vanilludropar
- múskat á hnífsoddi
- 50g sýrður rjómi
- 1 maukaður banani
Krem
- 80g mjúkt smjör
- 120g flórsykur
- 1tsk vanillusykur
- 4msk hlynsíróp
Leiðbeiningar
Kökur
- Hitið ofninn í 180 °C. Hrærið saman smjör og sykur í 4-5 mín.
- Bætið egginu út í og hrærið vel saman.
- Sigtið hveiti og matarsóda saman og bætið út í deigið. Blandið vanilludropum, múskati, banana og sýrðum rjóma út í og hrærið vel saman.
- Setjið pappírsform ofan í múffubakka og skiptið deiginu á milli formanna. Bakið í 20 til 25 mínútur.
Krem
- Hrærið smjör og flórsykur vel saman.
- Bætið vanillusykri og hlynsírópi út í hrærið vel saman. Svo er hægt að leika sér með matarlit líkt og ég gerði og sést á myndunum fyrir ofan.
