Það er varla hægt að bjóða uppá berjamánuð hér á Blaka án þess að baka úr bláberjum – eftirlæti Íslendinga.
Nú flykkist þjóðin í berjamó og það þarf náttúrulega að gera eitthvað við öll þessi ber. Og þegar búið er að fylla um það bil trilljón sultukrukkur er tilvalið að hlaða í þessar bláberjamúffur. Ofureinföld uppskrift en bragðið himneskt! Þannig vil ég hafa það!
Formin fékk ég í Söstrene Grene á skid og ingenting!
Fallegar í röð.
Múffuyndi.
Súperauðveldar bláberjamúffur
|
|
|
Hráefni
- 200g Kornax-hveiti
- 90g sykur
- 2tsk lyftiduft
- 1/4tsk salt
- 1tsk sítrónubörkur
- 2 Nesbú-egg
- 80ml mjólk
- 1tsk vanilludropar
- 80ml olía
- 3msk sítrónusafi
- 150g bláber
- púðursykur(til að drissa ofan á)
Leiðbeiningar
- Hitið ofninn í 220°C. Blandið saman hveiti, sykri, lyftidufti, salti og sítrónuberki saman í skál og setjið til hliðar.
- Blandið eggjum, mjólk, vanilludropum, olíu og sítrónusafa saman í annarri skál.
- Blandið eggjablöndunni saman við þurrefnin og hrærið vel saman.
- Bætið bláberjunum varlega út í blönduna.
- Deilið deiginu á milli möffinsforma og drissið smá púðursykri yfir hverja og eina köku.
- Bakið í 20 til 25 mínútur og leyfið kökunum aðeins að jafna sig áður en þið gúffið þeim í ykkur.
