Nú nálgast Valentínusardagurinn óðfluga og þar sem ég fann þessi sætu, hjartalaga form í Tiger um daginn ákvað ég að hlaða í eina ómótstæðilega og sóðalega góða uppskrift.
Við erum að tala um Dumle-súkkulaðiköku á tvo vegu sem á eftir að slá í gegn hjá þeim sem þú elskar – hvort sem það er maki, börn, fjölskylda eða vinir. Þessi kaka hefur allt – súkkulaði, karamellu og stökkar kúlurnar inni í Dumle-namminu kóróna svo blönduna. Sjálf kakan er eins í báðum formum en toppurinn er mismunandi – báðir jafngóðir samt!
Hjartaformin eru í minni kantinum en þessi uppskrift ætti líka að passa í eitt 20 sentímetra, kassalega form. Njótið með ykkar heittelskuðu!
Mér fannst ekki nóg að gera eina týpu.
Girnilegt hjarta.
Lítil ástarkaka til þín.
Dumle er í miklu uppáhaldi.
Dumle-súkkulaðikaka á tvo vegu
|
|
|
Hráefni
- 3/4bolli sykur
- 3/4bolli púðursykur
- 115g bráðið smjör
- 2 Nesbú-egg
- 3msk rjómi
- 1tsk vanilludropar
- 1 1/8bolli Kornax-hveiti
- 1/2bolli kakó
- 1/2tsk lyftiduft
- smá sjávarsalt
- 1poki Dumle Snacks
- handfylli möndluflögur
- 4msk rjómi
Leiðbeiningar
- Hitið ofninn í 180°C og takið til form.
- Blandið sykri, púðursykri og smjöri saman með písk (ég nota aldrei handþeytara eða hrærivél þegar ég geri svona brúnku, eða brownies).
- Bætið eggjunum út í, einu í einu og hrærið vel. Því næst er rjómanum (3 msk) hrært saman við.
- Blandið hveiti, kakói, lyftidufti og salti saman í annarri skál. Blandið þurrefnunum varlega saman við sykurblönduna en bara rétt svo þar til allt hefur blandast saman.
- Deilið deiginu á milli tveggja forma ef þið notið litlu, sætu hjartalaga formin.
- Dreifið möndluflögum yfir aðra kökuna og skellið þeim báðum í ofninn.
- Eftir 30 mínútur takið þið aðra kökuna úr ofninum og raðið Dumle Snacks (ca 1/2 poki) ofan á hana. Setjið hana aftur inn í ofn og bakið í 5-15 mínútur í viðbót en mér finnst gott að hafa svona brúnku aðeins blauta.
- Á meðan hitið þið 4 msk af rjóma í örbylgjuofni. Hellið restinni af Dumle Snacks í skál og hellið síðan brennandi heitum rjómanum ofan á nammið. Látið þetta standa í smá stund og hrærið síðan saman. Ef allt súkkulaðið hefur ekki bráðnað er lítið mál að henda þessu aðeins inn í örbylgjuofninn aftur.
- Takið kökurnar úr ofninum. Stingið nokkur göt í kökuna með möndluflögunum og hellið Dumle-rjómablöndunni ofan á hana á meðan hún er heit.
